Vum 27. bis den 28. Mee fënnt eisen traditionelle Päischttournoi statt. Och dëst Joer hunn sech rëm vill Ekippen ugemellt. De komplette Programm an d’Reglementer fannt dir hei ënnendrënner!

• Bambinis: Walfer, Kielen, Monnerëch, Bissen, Brouch, Luerentzweiler, Stesel, Lëntgen

Réglement Bambinis 2012

Plan du tournoi de Pentecôte 2012_Bambinis

• Minimes: Walfer, Jonglënster, Mäerzeg, Betebuerg, Stesel, Miersch, Bissen, Noumer/Colmar-Bierg, Monnerëch, Lëntgen/Luerentzweiler

Réglement Minimes 2012

Plan du tournoi de Pentecôte 2012_Minimes

• Poussins: Bissen, Luerentzweiler, Jonglënster, Etzella, Walfer, Miersch, Baastenduerf, Stesel, Noumer/Colmar-Bierg, Lëntgen

Réglement Poussins 2012

Plan du tournoi de Pentecôte 2012_Poussins

• Pupilles: Kielen, Stesel, Harel/Tarchamps, Bissen, Noumer/Colmar-Bierg, Mäerzeg, Miersch, Jonglënster, Monnerëch, Luerentzweiler, Brouch, Lëntgen

Réglement Pupilles 2012

Plan du tournoi de Pentecôte 2012_Pupilles

• Scolaires: Beggen, Jonglënster, Kielen, Märel, Miersch, Walfer, Bissen, Noumer/Colmar-Bierg, Monnerëch, Lëntgen/Luerentzweiler

Réglement Scolaires 2012

Plan du tournoi de Pentecôte 2012_Scolaires

Fir Iessen, Gedrénks an Animatioun ass beschtens gesuergt! Am viraus scho villmols Merci fir all Ennerstëtzung / Participatioun.

D’Jugendkommissioun vum FC Minerva Lëntgen

2 – 1, mat 3 Punkten fir déi laang Rees an den Norden belount ginn, mais et war en Herzschlagfinale wéi am Titelrennen an England, well eis Minerva réischt an de leschte Minutten erléist ginn ass…

Mir hunn Harel direkt vun Ufank un kontrolléiert an si hu just selten de Wee an ons Halschent fonnt…wann et da mol laanschtgaangen ass, war de Fändel vum Abseits séier uewen. An der 13. Minutt gëtt den Tarek zimlëch plomp am Strofraum geluecht. Déi Onparteiësch huet awer, zum Onverständnis vun deene matgereeste Lëntgener Supporteren, eng “Schwalbe” interpretéiert an den Tarek mat giel belount. Eng ganz zweifelhaft Arbitteschleeschtung, déi sech wéi e roude Fuedem duerch dat Spill gezunn huet: onnéideg Feler si gepaff ginn wou een hätt kënne Virdeel lafe loossen, en offensichtlëchen Händs ass zwee mol ignoréiert ginn an de Pier ass (zum Nodeel vun deenen Hareler dës Kéier) ongestroft an deene läschte Minutten dovu komm, wourops den 1 – 2 fir Lëntgen gefall ass.

Komme mir awer zréck zum Ufank, et ass déi 16. Minutt an de Pier probéiert sech nach emol un engem Fräistouss, dës Kéier geet de Ball zwar duerch d’Mauer, säi Schoss war awer net cadréiert genuch. An der 38. Minutt sinn déi Hareler fir d’drëtt an eis Halschent komm… en drëchenen Distanzschoss kann de Miagi just nach iwwert de Goal déviéieren. Erwähnenswäert ass nach, dass dee Ball sou fest geschoss war, dass en uewen am Fangnetz hänke bliwwen ass. Och de Corner, deen Harel duerch dës Aktioun eraushëllt fëscht eise Miagi, deen haut a Beschtform ass, souverän aus der Loft.

Kuerz virun der Halschent nach emol eng Standardsituatioun fir Lëntgen: dem Schmolli säi Gewaltschoss geet leider uewen an d’Fangnetz. Och de Bonny huet nach emol d’Gelegenheet endlech den 1 – 0 ze schéissen, mais nodeems en 3 Spiller stoë geloss huet, passt en dem Goalkeeper de Ball an de Grapp.

Nom Pausentéi hëllt de Flëpp sech en Häerz a probéiert no e puer Crochet’en säi Gléck aus der Distanz; den Hareler Schlussmann kann dëse Schoss awer ofwieren. Och an der 54. Minutt geet et dem Tarek net besser, wéi säi Schoss laanscht de Goal geet.

Nodeems de Flëpp gefoult gëtt, kënne mir kee Profit aus dem Fräistouss zéien, de Ball kënnt awer bei de Mike, deen sech géint e puer Hareler duerchsetzt an de Ball op den Bonny eraflankt deen zum 0 – 1 erakäppt. Kuerz drop gëtt et rëm geféierlech am Lëntgener Strofraum. No engem Ball an d’Déift wollt de Schmolli de Ball ganz lässeg an den “Aus” rulle loossen, vertendelt en awer, a sou verléiert en de Ball un en Hareler. Nodeems de Schmolli deen dann emgeméint huet, gëtt et e Fräistouss fir Harel kuerz virun eisem Strofraum. Wéi sou oft an dësem Match, konnt de Miagi souverän klären.

An der 70. Minutt, dueble Wiessel fir Lëntgen: Kohlowski fir de Mike an den Dylan fir de Flëpp.

An der 72. Minutt schéisst Harel den 1 – 1. no engem Mëssverständnis an eiser Verteidegung: Ausgangssituatioun war e Fräistouss. Harel erhéicht bal op 2 – 1, an der 82. Spillminutt geet en Hareler alleng Richtung Goal. De Miagi, eng Maschinn am 1 géint 1, erwëscht de Ball nach in extremis mam Fouss a verhënnert e Réckstand.

An der 83. Minutt wiessele mir eng leschte Kéier an de Maniche kënnt fir den Dany eran.

An der Nospillzäit vun dëser Partie gelengt et Harel nach emol, alleng virum Miagi opzekräizen, mais deen rett eisen Ar… nach emol mat enger Glanzparade. No engem douce Bodycheck récupéréiert de Pier de Ball, an d’Relance geet deenen Hareler en Tick ze schnell: den Tarek schéisst den 1 – 2 fir Lëntgen an domat ginn déi 3 Punkten mat an den Uelzëchtdall.

Opgrond vun de Chancen déi mir erausgespillt hunn, hätt d’Resultat méi héich missen ausfalen. Den Hareler hir puer Chancen waren all Kéiers immens geféierlëch, an dowéinst ass eise “man of the match” de Miagi, deen eis Faarwen am Spill gehalen huet! Déi läscht Partie am Championnat gëtt e Sonndëg zu Lëntgen géint Luerentzweiler gespillt. E weidere flotten Derby, deen een sech net entgoe loosse sollt! Mir kënne weiderhinn just op en Ausrutscher vu Bissen hoffen fir dass mir awer nach de Barragematch kënne spillen.

Come on Minerva!

[Show as slideshow]

123►

Eischt bemierkenswäert Aktioun war an der 14. Minutt dem Pier säi Fräistouss, deen awer leider mat voller Wucht an déi Felener Mauer gaangen ass. Kuerz drop sollte mer eis awer eng weider Chance erspillen wéi den Tarek iwwert d’Säit duerchgaangen ass an dem Dany de Ball an de Fouss gespillt huet: nëmmen déi gutt Reaktioun vum Felener Goalkeeper konnt eise Féirungstreffer verhënneren. Mir hunn den Drock erhéicht, et huet awer wéi sou oft am Ofschloss net geklappt. An der 23. Minutt sollten déi Felener du hir éischt Chance erausspillen, de Poteau huet eis zum Gléck direkt zwee mol hannerteneen gehollef an esou sollt d’Null stoë bleiwen.

Aus engem weidere Fräistouss konnte mir an der 25. Minutt keen Avantage zéien an de Pier huet an der 27. eng giel Kaart krut well en d’Noutbrems huet missen zéien.

An der 31. Minutt konnt de Lëntgener Public du endlech jubelen wéi de Bony den 1-0 fir Lëntgen erzilt huet. Kuerz drop direkt déi nächst grouss Chance fir Lëntgen: de Schmolli setzt sech iwwert d’Säit duerch, den Dany geréit seng Flank awer net richteg a sou geet de Ball laanscht de Goal. Nodeems de Schmolli et nach emol aus der Distanz probéiert gi mir an d’Paus.

Déi zweet Halschent war knapps amgaang, du huet den Andy no enger Flank vum Tarek de Ball ganz non-chalant zum 2 – 0 erageschärt. Keng Minutt gesi mer déi selwëscht Aktioun nach emol mam Schmolli a mam Andy, dës Kéier awer leider ouni dass e Foal gefall ass. Och de Pier hat de Sak bal zougemaach wéi en alleng virum Goal seng Stiermerqualitéiten wollt ënnert Beweis stellen: leider hat en de Ball net richteg geroden (méi dozou am Interview) an de Ball geet iwwert de Goal.

An der 57. Minutt schwächt sech Felen, nodeems hire Stiermer wéinst enger Tätlëchkeet um Andy déi roud Kaart gewise kritt.

66. Minutt, de Ribeiros Flëpp kënnt fir de Maniche eran. An der 67. probéiert de Pier nach emol säi Gléck mat engem Fräistouss: säi Bommeschoss land an engem Felener Mo.

69. Top Chance fir Lëntgen duerch den Dany an de Bonny.

79. mi lossen et méi roueg ugoen, an den Dany geet fir den Dylan eraus. An der 88. Minutt huet de Bonny nach emol eng gutt Chance mais et sollt net sinn.

Opgrond vun der zweeter Halschent eng verdéngte Victoire. Wéi schonn am läschte Commentaire gesot, läit et nom Match géint Bissen net méi an onser Hand: dat eenzegt wat mir maache kënnen ass eis Matcher ze gewannen.

COME ON MINERVA!

dem Pier säi Kommentar nom Match

dem Miagi säi Kommentar:

d’Fotoën zum Match:

[Show as slideshow]

12►

                            SC Ell – FC Progrès Niedercorn

Samsdes den 12. Mee 2012 am Stade « Jean Donnersbach », Lintgen um 17.00 Auer

Den Entrée kascht  5.- € All Jonken ënnert 16 Joer kënnt gratis eran (carte d’identité weisen).

3 – 1 verléiere mir zu Bissen am Spëtzematch em déi zweet Plaz. No deem ville Reen an deene läschten Deeg huet den Terrain och éischter engem Sumpfgebidd geglach. Den Här Pinto, nodeems en dann endlech déi richteg Tenue fonnt hat, huet de Match mat 20 Minutte Retard ugepaff.

Déi éischt 10 Minutten war d’Partie zimlech ausgeglach, an et huet net sou ausgesinn, wéi wa Bissen eis geféierlech kéint ginn. No engem heftegen Zesummestouss am Bissener Stroofraum hu mir scho fréi missen op de Kohls Claude verzichten, dee mat engem Gackelchen am Gesiicht an d’Urgence gefuer ass. Aus dem Näischt huet Bissen den 1 – 0 geschoss, op e Stellungsfeler an eiser Verteidegung. Mat deem Resultat si mir an d’Halbzeit gaangen an hunn op den Ausgläich gedréckt. An da kënnt et ganz batter fir ons Minerva; innerhalb vu kuerzer Zäit gëtt et rëm 2 mol Onstëmmegkeeten an der Défense an et steet 3 – 0. Ee Bissener Spiller geet ëmmer laanscht 2 – 3 Verteideger; beim Versuch en ze stoppen entstinn esou Lächer an onser Défense.

Nodeems den Dany am Bissener Strofraum vun de Been gehuel gëtt, weist den Här Pinto op den Elefmeter-Punkt. Soll et nach emol spannend ginn a kréie mir d’Gelegenheet nach emol erunzekommen? Dem Maniche säin Elefmeter geet iwwert de Goal, a sou geheie mir weiderhin alles no vir. Schlussendlech trëfft den Dany mam Kapp zum 3 – 1. Lëntgen ass definitiv um Drécker, mais mir vermasselen eng hallef Dozen Chancen: sou zum Beispill de Bonny e puer mol mam Kapp. An deene läschte 5 Minutten hätt de Pier et nach emol spannend kënne maachen, mais een vu senge Matspiller stoung him am Wee, a sou ass de Ball net eragaangen. Net ze vergiessen sinn dem Miagi seng Paraden, déi an deene läschte Minutten Schlëmmeres verhënnert hunn, wéi déi Bissener gekontert hunn.

Alles an allem kënne mir mat deem Resultat net zefridde sinn, well mir eis ënner Wäert verkaf hunn. Et wier méiglëch gewiescht, dee Match ze dréien, mais dofir ware mir an eiser Chanceverwäertung net realistësch genuch. Lo heescht et un deenen éischte Plazen dru bleiwen an op en Ausrutscher vun deenen aneren hoffen.

GO MINERVA GO

Kommentar  op wort.lu:

Claude Ottelé (entraîneur de Lintgen): «Nous avons perdu les duels et dans une rencontre quand on perd les duels, on a de forte chance de perdre le match. Bien qu’avec les événements de fin de match (penalty et multiples occasions), nous avons manqué de changer le cours du match.» Bissen – Lintgen 3-1

[Show as slideshow]

12►

- den 0 – 2 vum Schmolli géint Iechternach

- méi Fotoën a Filmer vum Match géint Miersch (thx Mollbert)

den 0 – 2 duerch de Christophe Schmol

d’Ballon’en starten (Lëntgen-Miersch)

Fiesta nom Match

déi zweet Série Fotoën vum Match géint Miersch (Mollbert)

[Show as slideshow]

123►

Pünktlëch virum Ustouss huet d’Wieder sech vu senger beschter Säit gewisen an sou hate mir eng herrlech Kuliss fir den Derby am Uelzechtdall. Eng gutt 300 Spectateuren haten d’Keess passéiert an d’Publikum wéi och d’Spiller hunn, sou engem Derby würdeg, drop gebrannt dass et endlech lass geet.

[[Show as slideshow]]

An dës Kéier sollt d’Equipe alles richteg maachen, well einfach alles gestëmmt huet. Mir sinn als Equipe géint Miersch op den Terrain komm, een ass fir deen anere gelaf a jiddfereen huet gekämpft. Relativ schnell war kloër, dass eis Equipe haut onbedengt déi 3 Punkte géint Miersch wollt.

Ab elo ass meng Mémoire net onbedéngt korrekt, mais eppes ass kloer; no ongeféier 10 Minutten krute mir e Penalty zougesprach well den Dany am Strofraum gefoult ginn ass, de Maniche verwandelt sëcher zum 1 – 0. Doropshinn hu mir et e bësse méi lues ugoe gelooss an déi Mierscher sinn ëmmer besser an de Match komm. Richteg geféierlech konnten se dem souveräne Miagi awer net ginn, well eis Verteidegung stoung gutt. E bëssen iwwerraschend ass dunn den 2 – 0 gefall, nodeems de Maniche et no e puer Crochet’en einfach mol aus der Distanz probéiert huet. De schwaache Schoss, mir konnten et selwer bal net gleewen, ass ënnert dem Goalkeeper vu Miersch an d’Netz gekullert. Zu allem Iwwerfloss huet sech e Mierscher Spiller duerch stännegt Maulen mam Arbiter eng giel-rout Kaart agefaangen. Mat dem Polster vun 2 Goaler si mer an d’Paus gaangen.

No der Halschent huet den Dany no engem wonnerbare Corner mam Kapp zum 3 -0 ragesat an den Ofschloss huet de Mike gemaach andeems en nach emol op 4 – 0 erhéicht huet.

Eng super Reaktioun vun der Equipe no deem desolaten Himatch. Hoffentlëch kënne mir dëse Schwong an déi nächst Matcher mathuelen. E grousse Merci un de Claudio fir d’Fotoën; an den nächsten Deeg kommen nach Fotoen derbäi.

COME ON MINERVA!

den Elefmeter vum Maniche (1-0)

[Show as slideshow]

12345►

0 – 2 Victoire géint den Daring vun Iechternach. Dat typescht Abrëllswieder an en Iechternacher Terrain an engem net grad immensen Zoustand, dat waren d’Rahmenbedingungen fir dësen 21. Spilldag an der Abteistadt.

Mir hunn direkt mat 100 à l’heure ugefaangen an Drock op den Iechternacher Goal gemaach. An der 7. Minutt hëllt hire Goalkeeper de Flëpp am Strofraum zimlech rabiat vun de Been, mais den Arbiter päift keen Elefmeter; et gëtt emol keng Kaart. No dëser éischter Opreegung gesi mer an der 17′ e flott Kombinatiounspill vum Sam an dem Maniche, déi de Ball op de Flëpp spillen dee just puer Zentimeter laanscht de Poteau schéisst. Déi Iechternacher komme just vereenzelt Richtung Lëntgener Goal an hir Ugrëff sinn ze harmlos fir dem Miagi seng Këscht a Gefoer ze bréngen. Sou ass eng Standartsituatioun déi gréisste Chance fir déi Iechternacher: hire Fräistouss geet awer an d’Mauer; den Noschoss kann de Miagi ofwieren. Maniche an Tarek probéieren et nach e puer mol aus der Distanz an da gi mir net all ze zefridden an d’Paus.

An der zweeter Halschent solle mer eis dann méi Goalchancen erspillen, mais et hapert ewéi sou oft um Ofschloss. An der 55′ kommen de Piu an den Dany fir de Mike an de Sam eran. Eng gutt Chance hu mir an der 63′ Minutt, mais dem Maniche säi gutt geschossene Fräistouss kann den Iechternacher Goalkeep halen. Kuerz drop huet den Dany d’Chance fir eis a Féirung ze bréngen, mais och säi Kappball trëfft d’Zil net.

70′, läschte Wiessel fir Lëntgen, de Schmolli kënnt fir den Dylan eran…a wat war eise Schmolli fir en Joker: hien huet Vitesse an d’Spill bruecht, mir hunn lo öfters schnell iwwert d’Säit ugegraff an nach méi Drock op déi Iechternacher Défense gemaach.

An der 75′ Minutt huet et nach emol geheescht déif Duerchotmen, besonnëg fir de Maniche: No e bëssen Duercherneen an onser Verteidegung spillt sech Iechternach eng gutt Chance eraus; mir kënne klären mais den Noschoss kritt de Maniche an de Mo.

Gréisst Chance vum Match dann an der 80′ Minutt, wou mir no vill Gegarrels an hierem Strofraum eng 100% Chance versiften. Op de Gradin’en ginn se esou lues nervös; solle mer just 1 Punkt aus deem Match kréien??? Zum Gléck platzt de Knuet endlech an der 85′ an den Tarek mecht dem Maniche säi Corner mam Kapp eran. Erliichterung op Lëntgener Säit an de Wëllen vun deenen Iechternacher ass gebrach. Knapps 2 Minutten drop mecht de Schmolli de Sak no enger super Virlag vum Becher zou. Bal hätte mir den 0 – 3 nach geschoss: no engem Steal vum Maniche geet den Tarek alleng op de Goal, e scheitert awer leider um Goalkeeper.

  Opgrond vun der zweeter Halschent war déi Victoire op engem net gutt spillbaren Iechternacher Terrain verdéngt. D’Jongen hunn sech gutt zréckkaf, lo heescht et weider sou Minerva! Nächste Sonndëg an eise Reschtprogramm get secher rëm keen Zuckerschlecken, mais als Equipe kënne mir et packen uewen derbäi ze bleiwen!

Come on Minerva!!!

[Show as slideshow]

12►

D’Wiederkonditiounen waren net grad déi Allerbescht, a sou hu mir an der éischter Halschent mat engem staarke Géigewand ze kämpfen… Konditiounen déi deen een oder anere komesche Ball a Schoss erklären; trotzdem soll et awer net driwwer ewegtäuschen, dass mir eis Zweekämpf net gewonnen hunn an net jiddereen matgeschafft huet. Trotz allem schéisse mir kuerz virun der Halbzeit den 1 – 0 (Dany).

Déi zweet Halschent huet de Wand sech geluecht a mir fänken déi éischt 10 Minutten mol guer net sou schlecht un; maachen Drock, spillen de Ball flaach an an de Fouss. D’Alliance kritt e Spiller vum Terrain gesat a kuerz drop gëtt d’Equipe waakreg…leider net eis mais d’Gäscht aus dem Äischdall. Innerhalb vun e puer Minutten dréien si de Match; mir wierken net présent um Terrain, kucke just no a knuppen de Ball no vir. Eise Géigner huet zwar ee Mann manner um Terrain, mais dat fällt emol net op: et schéngt éischter wéi wa mir an Ennerzuel wieren.

E Match fir absolut ze vergiessen. Hoffentlëch gi verschidde Spiller mol wakreg gerëselt…wou ass d’Spillfreed? Wou sinn d’Emotiounen an den Asaz fir d’Equipe? Jiddereen kann dat 100 mol besser wéi dat, wat mir e Sonndëg gesinn hunn!

COME ON MINERVA!!! dir wësst et dach, et geet och esou…